Қазақстанда алғаш рет ҚР ПІБ МО ауруханасының базасында қатерлі ісік мутацияларын қан арқылы анықтаудың жаңа әдісі енгізілді
ҚР ПІБ Медициналық орталығы ауруханасында адам қанындағы еркін айналымдағы ісік ДНҚ-сын зерттейтін бірегей технология енгізілді. Бұл әдіс Қазақстанда және көршілес елдерде бұрын-соңды қолданылмаған, алғаш рет енгізіліп отыр. Бұл өте күрделі әдіс болғандықтан, заманауи құрылғылар мен гендік талдаудың ең озық технологияларын қажет етеді.
Жаңа әдістеме көктамырдан алынған қан арқылы ісік жасушаларын және гендегі өзгерістерді, яғни мутацияларды табуға мүмкіндік береді. Бұл аурудың қалай дамитынын және метастаздардың (ісіктің таралуы) басталуын ауру белгілері білінбестен 8 айдан 19 айға дейін ерте білуге жол ашады.
«Біз онкологияның болашағы саналатын әдісті енгіздік. Ол қатерлі ісікті өте ерте кезеңде анықтауға, гендегі өзгерістерді нақтылауға және биопсия, яғни ісіктен кесіп алып тексеру мүмкін болмаған жағдайда диагноз қоюға көмектеседі. Осы көрсеткіштер арқылы метастаздардың басталуын 8-19 ай бұрын болжай аламыз», – дейді Аурхананың Дербестендірілген геномдық диагностика зертханасы басшысы Гүлшара Әбілдинова.
Қазіргі уақытта гендегі 52 түрлі өзгерісті табатын арнайы сынамалар әзірленіп, алғашқы нәтижелер де алынды. Бұған дейін ісіктің мутациялық профилін анықтау мүмкін болмаған науқастарда генетикалық өзгерістер табылып, соған сәйкес таргеттік терапия тағайындалды.
Бұл әдіс әсіресе сүт безі қатерлі ісігі бар науқастар үшін өте тиімді әрі маңызды. Себебі ол аурудың таралу белгілерін уақытында анықтап, емдеу жоспарын дер кезінде өзгертуге мүмкіндік береді.
Жаңа әдіс дәрігерлер үшін үлкен мүмкіндік ашып отыр. Енді онколог және химиотерапевт дәрігерлер емді алдын ала жоспарлап, науқасқа қажетті таргеттік немесе қосымша емді дер кезінде бастай алады.
